2022 жылғы 30 қарашада сағат 11.00-де Шығыс Қазақстан өнер музейінің музыкалық залында былтырғы жылы облыс мәдениетіне ерекше серпін берген "Дала дидары" облыстық өнер фестивалінің кітап-каталогының тұсаукесері мен Ертіс жағасындағы үш облысты қамтыған өңірлік деңгейдегі ірі жобаның қорытындысы шығарылды. Шараға суретшілер, қаламыздағы өнер сүйер зиялы қауым, Шығыс Қазақстан аудандарының мәдени мекемелерінің өкілдері және Семей, Павлодар Шемонаиха қалаларынан келген қонақтар қатысты.
2021 жылы ШҚО-ның 16 ауданынан музыкалық шығармашылық ұжымдардың, қолданбалы өнер шеберлерінің, суретшілер мен графиктердің қатысуымен фестивальдік бағдарламалар Өнер музейінде жыл бойы жалғасын тапқан болатын. Осы фестиваль туралы шағын әрі нақты ақпаратты қамтиытын, түрлі-түсті фото суреттермен безендірілген бұл кітап-каталог ШҚ облысының мәдениет майталмандары мен бейнелеу өнері өкілдерінің Тәуелсіздікке қосқан рухани үлесі деп айтуға болады.
Іс-шара бағдарламасының екінші бөлімі биылғы жылы еліміздің мәдениет министрлігі белгілеген мерейтой иелерін насихаттау мақсатында, "Ұлы даланың ұлы есімдерін" ұлықтауға арналған "Тарихымыздың ұлы тұлғалары" (Ахмет Байтұрсынов –150 жыл, Мұхтар Әуезов –125 жыл, Ізғұтты Айтықов – 100 жыл, Мәншүк Мәметова-100 жыл, Роза Бағланова -100 жыл, Талғат Бигелдинов-100 жыл, Хиуаз Доспанова-100 жыл) Ертіс өңірлік бейнелеу өнері байқауының салтанатты марапаттау рәсіміне ұласты. Байқаудың мақсаты – музей қорын сапалы әрі тақырыптық туындылармен толықтыру, жастарды тарихи тұлғалардың жарқын бейнесі арқылы тәрбиелеу және көпшілікке насихаттау болып табылады.
Шығыс Қазақстан өнер музейі үнемі ұйымдастыратын осындай ауқымды шараның жоғары деңгейде өтуіне қолдау көрсетіп, өңірлердегі бейнелеу өнерінің дамуына үлкен ықпал жасап отырған Шығыс Қазақстан мәдениет басқармасы екенін баса айтқымыз келеді.
Байқауға Ертіс өңірінің Шығыс Қазақстан, Абай және Павлодар облыстарынан 26 суретшінің Қазақстанның батырлары мен көрнекті тұлғаларына, мәдениет қайраткерлеріне арналған 43 туындысы сарапталып алынды.
28 қарашада білікті мамандардан құрылған қазылар алқасы байқау жеңімпаздарын анықтады.Қазылар алқасының отырысына ҚР Суретшілер Одағының және Лондон қ. "Гильдия" шығармашылық бірлестігінің мүшесі, ҚР Өнер академиясының академигі, «Құрмет» орденінің иегері Баяндин Әділғали Сәрсенұлы төрағалық жасады. Қазылар алқасының құрамында ШҚ өнер музейінің директоры - Ұябаева Бекайым Қасымханқызы және музей мамандары, сондай-ақ Д.Серікбаева атындағы Шығыс Қазақстан техникалық университетінің Қазақстан тарихы және әлеуметтік-саяси пәндер кафедрасының аға оқытушысы - Жақсылықов Амантай Фрунзеұлы және ҚР ағарту ісінің үздігі, бейнелеу өнерінің оқытушысы Бітібаева Жаңыл Омарғалиқызы болды.
Байқау нәтижесінде "Тарихымыздың ұлы тұлғалары" атты Ертіс өңірлік бейнелеу өнері байқауының "Бас жүлдесін" және 700,0 мың теңге көлеміндегі қомақты сыйақыны үш аталым бойынша ерекше шеберлікпен қалам тербеген, Ізғұтты Айтықов пен Роза Бағланованың кескіндемелік, Хиуаз Доспанова мен Талғат Бигелдиновтың графикалық портреттерін тарихи нақтылықпен жазып, оқ бойы озық болғаны үшін белгілі суретші және графикші, ҚР Суретшілер Одағының мүшесі Жуванышев Тілеуғазы (Семей қ.) жеңіп алды.
"Сюжеттік картина.Кескіндеме" аталымы бойынша Нұрсадықов Есбол (Өскемен қ.) "Тарихымыздың ұлы тұлғалары" байқауының ережесінде ұсынылған майдангер батырларды бір кенепте біріктіретін өзіндік сюжеті мен озық ойы үшін I дәрежелі дипломын (500,0 мың теңге) иеленді.
Осы аталым бойынша Бейсембаев Аманбек "Алаш" ардақтысы Ахмет Байтұрсынұлын ұлт-азаттық қозғалысы жетекшілерінің отырысы желісінде бейнеленген сюжеттік кескіндемесі II дәрежелі дипломмен (300,0 мың теңге) марапатталды.
Солтанбаев Ақертіс (Павлодар қ.) ұлы тұлға, халық ағартушысы, "Алаш Орда" үкіметінің ұйымдастырушысы Ахмет Байтұрсынұлын өмірдегідей сюжеттермен, "сөйлейтін" фонда көркем бейнелегені үшін III дәрежелі дипломының (200,0 мың теңге) иегері атанды.
Сонымен қатар осы аталымдағы қазылар алқасының ынталандыру сыйлығын (80,0 мың теңге) - барлаушы, Кеңес Одағының Батыры Ізғұтты Айтықовты бейнеленген Тұрғанбаев Ержан (Өскемен қ.) мен Талғат Бегелдиновты ерекше бейнелеген "Әжемнің дұғасы" жұмысының авторы Зура Асылғазина (Павлодар қ.) еншіледі.
Ал, байқауда суретшілердің ең көп қалам тербеген "Кескіндемелік портрет" аталымы бойынша Әубәкір Анар (Павлодар қ.) – майдангер батырлар Мәншүк Мәметова, Талғат Бигелдинов және халық әртісі, майдан шебінде өнер көрсеткен Роза Бағланованы ерекше стилде бейнелегені үшін І дәрежелі дипломын (400,0 мың теңге) жеңіп алды.
Қайырхан Мәди (Өскемен қ.) - жас пулеметші Мәншүк Мәметова, даңқты ұшқыштар Хиуаз Доспанова және Кеңес Одағының екі мәрте батыры Талғат Бигелдиновты бейнеленген триптихы үшін II дәрежелі дипломымен (250,0 мың теңге) марапатталды.
Плотникова Ольга (Өскемен қ.) - қазақ әдебиетінің классигі Мұхтар Әуезовтің графикалық портреті және Хиуаз Доспанованың кескіндемелік бейнесін шебер орындағаны үшін III дәрежелі дипломмен (160,0 мың теңге) және Әділбек Қуаныш (Катон қарағай ауд.) - ұлт ұстазы Ахмет Байтұрсынұлының бейнесін авангардтық шешімде бейнелегені үшін III дәрежелі дипломын (100,0 мың теңге) иеленді.
Шоқанов Әлібек (Тарбағатай ауданы) –"Бала Мұхтар" картинасы үшін қазылар алқасының ынталандыру сыйлығын (80,0 мың теңге) еншіледі.
Өңірлік байқаудың "Графикалық портрет" аталымы бойынша Нұржан Солтанбеков (Семей қ.) - Қазақстанның Халық қаһарманы, аты аңызға айналған ұшқыш Хиуаз Доспанованың бейнесін асқан шеберлікпен, классикалық деңгейде (тушь, қалам техникасында) бейнелегені үшін І дәрежелі дипломымен (300,0 мың теңге) марапатталды.
Осы аталым бойынша Ниязбеков Әділет (Өскемен қ.) - КСРО халық әртісі, Халық қаһарманы, Қазақ халқының күміс көмей, жез таңдай әншісі Роза Бағланованың бейнесін керемет графикалық бейнеде шешкені үшін II дәрежелі дипломын (200,0 мың теңге) иеленді.
Іс-шарада Шығыс Қазақстан облысы мәдениет басқармасының басшысы Ахметжанов Нұрболат Қадырұлы құттықтау сөз сөйлеп, байқау жеңімпаздарына жүлде табыстады. Сонымен қатар байқаудың қазылар алқасының төрағасы Баяндин Әділғали Сәрсенұлы және қазылар алқасының мүшесі бейнелеу өнерінің оқытушысы, ҚР ағарту ісінің үздігі Бітібаева Жаңыл Омарғалиқызы байқаудың жоғары деңгейде өткенін тілге тиек етті.
ШҚ өнер музейінің директоры Ұябаева Бекайым Қасымханқызы шараға ат салысқан барлық өнер иелеріне шығармашылық табыс тіледі.
"Бас жүлде" иегері суретші Тілеуғазы Жуванышев байқауды ұйымдастырушыларға өз алғысын білдіре отырып, мұндай шаралардың өңірлік суретшілер деңгейінің өсуіне жол ашатынын атап өтті.
ШҚ өнер музейінің екі залында орналасқан "Тарихымыздың ұлы тұлғалары" атты Ертіс өңірлік бейнелеу өнері байқауының марапаттау салтанаты мен көрменің ашылуында БАҚ өкілдері байқауға қатысушылармен және қазылар алқасының мүшелерінен, сондай-ақ экспозицияға алғашқы келушілерден сұхбат алды.
Көрме 2023 жылдың қаңтар айының соңына дейін жұмыс істейді.